अमळनेर-भर दिवसा मोटरसायकल चोरी करणारा अमळनेर तालुक्यातील एकरुखी येथील चोरटा अमळनेर पोलिसांच्या जाळ्यात आला आहे.
दिनांक 31 रोजी दुपारी अमळनेर शहरातील राजेंद्र रतनलाल वर्मा, राहणार प्रताप मिल कंपाऊंड अंमळनेर हे दुपारी जेवणासाठी घरी आले असता त्यांनी त्यांची हिरो होंडा स्प्लेंडर प्लस कंपनीची मोटरसायकल हॅण्डल लॉक करून त्यांचे घरासमोर लावली असताना कोणीतरी अज्ञात चोरट्याने ती चोरून नेल्याने त्यावरून अंमळनेर पोलिसात गुन्हा दाखल करण्यात आला होता. सदर प्रकरणी पोलीस निरीक्षक दत्तात्रय निकम यांनी अमळनेर पोलीस स्टेशनचे गुन्हे शोधपथकातील पोलीस उपनिरीक्षक नामदेव बोरकर यांच्या नेतृत्वात पोलीस कॉन्स्टेबल अशोक साळुंखे, मिलिंद सोनार, विनोद भोई, पोलीस कॉन्स्टेबल निलेश मोरे, विनोद संदानशिव, उदय बोरसे आदींना चोरीस गेलेली मोटरसायकल व अज्ञात चोरटा शोधण्याचे आदेश व सूचना दिल्या होत्या. पथकाने प्रताप मिल कंपाऊंड परिसर व इतर ठिकाणी सीसीटीव्ही कॅमेरे तपासून पाहिले तसेच गुप्त बातमीदार यांच्याकडून मिळालेल्या माहितीवरून विजय भाईदास भील वय 19 ,राहणार एकरुखी तालुका अमळनेर याने सदर मोटरसायकल चोरी केल्याचे निष्पन्न झाल्यावर त्याला एकरूखी येथून त्याच्या घरून ताब्यात घेऊन अटक करण्यात आली. आरोपीची पोलीस कस्टडी रिमांड घेण्यात आली. रिमांड मध्ये असताना त्याला सदर चोरीस गेलेल्या मोटरसायकल बाबत विचारपूस केली असता त्याने सदर मोटरसायकल ही चोरी करून डुबकी मारुती मंदिर परिसरातील झाडाझुडपांमध्ये लपवल्याची कबुली दिली.तेथून ती जप्त करण्यात आली आहे. पुढील तपास पोलीस हेडकॉन्स्टेबल अशोक साळुंखे करीत आहेत.
