अमळनेर:- चोपडा तालुक्यातील अडावद पोलिस ठाण्याचे पोलिस कॉन्स्टेबल संजय आत्माराम पाटील (वय ५१ वर्षे) यांचा दूर्दैवी मृत्यू झाल्याची घटना घडल्याने सर्वत्र हळहळ व्यक्त करण्यात येत आहे. गेल्या दोन दिवसांपासून रेल्वे अपघातात छिन्नविछिन्न परिस्थितीत असलेल्या मृतदेहाची ओळख आज नातेवाईकांकडून पटल्याने शवविच्छेदन करून मृतदेह नातेवाईकांच्या ताब्यात देण्यात आलेला आहे.या घटनेचे वृत्त चोपडयात येऊन धडकताच सर्वत्र शोककळा पसरली आहे.
याबाबत पोलिसांकडून प्राप्त माहिती अशी की, दि. १२ रोजी दुपारी ४:३०वाजेच्या सुमारास टाकरखेडा अमळनेर च्या मधील भागात अमळनेर नजीक मालधक्का रेल्वे पटरीवर एका ईसमाची बॉडी, चेहरा छिन्नविछिन्न अवस्थेत रेल्वे पोलिसांना मिळून आली. सदर बॉडी अमळनेर पोलिसांकडे सोपविण्यात आल्यानंतर बॉडीची ओळख पटविण्याचे काम सुरू झाले व मृतदेह ग्रामीण रुग्णालयात ठेवण्यात आला. पोलिस तपास सुरू असतांनाआज चोपडा शहर पोलिसात मिसिंग गुन्हा दाखल झाल्याने त्यांच्या नातेवाईकांकडे पोलिसांनी सदरील बॉडीची खात्री केली असता मयताचे कपडे व चप्पल वरुन पोलिस कॉन्स्टेबल संजय पाटील यांची बॉडी असल्याचे त्यांच्या पत्नीने ओळखले. यावरून अमळनेर ग्रामीण रुग्णालयात जाऊन खात्री केली असता पत्नीने आपल्याच पतीचा मृत्यू देह असल्याचे स्पष्ट केले.यानंतर शवविच्छेदन होऊन बॉडी नातेवाईकांचे ताब्यात देण्यात आलेली आहे.याबाबत अमळनेर स्टेशन मास्तर यांच्या खबरीवरून पोलिसात अकस्मात मृत्यूची नोंद करण्यात आली आहे.पुढील तपास पोहेकॉ गणेश पाटील हे करीत आहेत. पोलिस कॉन्स्टेबल संजय पाटील हे चोपडा येथील महावीर नगरातील रहिवासी असून ते शांत व मनमिळाऊ स्वभावाचे होते. त्यांनी चोपडा ग्रामीण पोलिस स्टेशन, अमळनेर पोलिस स्टेशन, सध्या अडावद पोलिस ठाणे याठिकाणी उत्कृष्ट सेवा बजावली आहे. त्यांच्या पश्चात पत्नी, मुलगा,मुलगी असा परिवार आहे.
