गांजा पुरवठा करणाऱ्याचा शोध घेऊन समूळ पायबंद घालणे आवश्यक…
अमळनेर : पोलिसांनी अनेकवेळा कारवाई करून देखील मोठ्या प्रमाणात गांजा शहरात येत असून तरुणाईला गांजा सेवन चे व्यसन जडले आहे. गांजा सेवन करणाऱ्या चार तरुणांविरुद्ध एनडीपीएस कायद्याप्रमाणे गुन्हा दाखल करण्यात आला आहे. मात्र या तरुणांना गांजा पुरवणाऱ्या हस्तीचा शोध घेणे आवश्यक आहे.
पोलीस निरीक्षक दत्तात्रय निकम यांना गोपनीय माहिती मिळाली की काही तरुण गांधलीपुरा भागात इदगाह मैदानजवळ रेल्वे ट्रॅक च्या बाजूला गांजा सेवन करीत आहेत. त्यांनी डीबी पथकातील पोलीस उपनिरीक्षक नामदेव बोरकर , हेडकॉन्स्टेबल विनोद सोनवणे ,मिलिंद सोनार , प्रशांत पाटील , विनोद संदानशीव , उज्वल म्हस्के , उदय बोरसे यांना छापा मारायला पाठवले असता जमील उर्फ अय्युब रऊफ पिंजारी वय २३ रा आययुडीपी कॉलनी तांबेपुरा , अनिस शेख अजीम वय २९ रा जपान जीन , आवेश शरीफ खाटीक वय २३ रा तांबेपुरा, शाहरुख खान सलीम खान यांना गांजा सेवन करताना पकडले.
यांच्याविरुद्ध अमली पदार्थ प्रतिबंधक कायदा १९८५ च्या कलम ८(क), २७ प्रमाणे गुन्हा दाखल करण्यात आला असून तपास विनोद सोनवणे , चंद्रकांत पाटील करीत आहेत. काही दिवसांपूर्वी देखील पोलिसांनी तरुणांना गांजा सेवन करताना पकडले होते. पोलिसांच्या कारवाईमुळे बिघडलेल्या तरुणाईला आवर घातला जात आहे.पोलिसांच्या सततच्या कारवाईमुळे त्यांच्यावर अभिनंदनाचा वर्षाव होत असला तरी गांजा पुरवठा कुठून होतो याचा ही शोध घेऊन या प्रकाराला समूळ पायबंद घालणे आवश्यक आहे.
