अमळनेर:- तालुक्यातील वावडे येथील १९ वर्षीय तरुणीचे तोरणमाळहून परत येत असताना अपघाती निधन झाल्याची घटना दिनांक २९ रोजी सायंकाळी घडली आहे.
याबाबत अधिक माहिती अशी की, वावडे येथील रवींद्र ठाकरे व कुटुंबीय तोरणमाळ फिरायला गेले होते. तेथून परत येत असताना येथून परततांना त्यांची मुलगी हर्षदा रवींद्र ठाकरे (वय १९) ही मावसभावासोबत स्कुटीवर येत होती. मात्र अनरदबारी जवळ रस्त्यावर असलेल्या खड्ड्यात गाडी घसरल्याने गाडीवर बसलेली हर्षदा रस्त्यावर पडली व मागून येत असलेल्या कंटेनरच्या मागच्या चाकाखाली डोके आल्याने तिचा जागेवरच मृत्यू झाला. ती शिरपूर येथील आर सी पाटील इंजिनियरिंग कॉलेज मध्ये द्वितीय वर्षाला शिकत होती. तिचे वडील प्रगतशील शेतकरी असून तिच्या या अपघाती निधनाने कुटुंबावर दुःखाचा डोंगर कोसळला आहे. या रस्त्यावर मोठ्या प्रमाणावर खड्डे असून खड्ड्यांमुळेच ह्या निष्पाप तरुणीचा जीव गेला आहे. सार्वजनिक बांधकाम विभागाच्या अक्षम्य दुर्लक्षामुळे रस्त्याची मोठ्या प्रमाणावर दुरवस्था झाल्याचे स्थानिकांची ही ओरड आहे.
