बसस्थानकावरील घटना, पोलीसात अज्ञात चोरट्याविरुद्ध गुन्हा दाखल…
अमळनेर:- येथील बसस्थानकावर बसमध्ये चढणाऱ्या प्रवासी महिलेच्या हातातील सोन्याची बांगडी अज्ञात चोरट्याने चोरुन नेल्याची घटना काल दुपारी दीड वाजेच्या सुमारास घडली आहे.
याबाबत अधिक माहिती अशी की, कळमसरे येथील आशाबाई चौधरी हे आपल्या पती हिरालाल चौधरी यांच्यासह कळमसरे येथून बसने अमळनेर बसस्थानकावर आल्या. जळगाव येथे जाण्यासाठी शिंदखेडा जळगाव बसमध्ये बसण्यास गेल्या. मात्र त्याठिकाणी चढणारे आणि उतरणारे प्रवासी यांची मोठी गर्दी होती. गर्दीत बसमध्ये बसल्यानंतर त्यांच्या डाव्या हातातील सोन्याची तीस ग्रॅम वजनाची बांगडी गायब झाल्याचे लक्षात आले. त्यानंतर अर्ध्या प्रवासातून परतत त्यांनी अमळनेर बसस्थानकावर शोध घेतला असता बांगडी मिळून आली नाही. त्यामुळे बसमध्ये चढताना गर्दीत अज्ञात चोरट्याने हातातून बांगडी चोरुन नेल्याची खात्री झाल्याने त्यांनी अमळनेर पोलीसात तक्रार केली असून पुढील तपास हे कॉ प्रमोद पाटील हे करीत आहेत.
