विहिरीतील पाण्याबाबत विचारणा केल्याचा आला राग…

काकाने विळ्याने केले पुतण्यावर वार…

अमळनेर:- विहिरीतील पाण्याबाबत विचारणा केल्याचा राग आल्याने काकाने पुतण्यावर विळ्याने वार केल्याची घटना तालुक्यातील गडखांब येथे घडली आहे.
     याबाबत अधिक माहिती अशी की, तालुक्यातील गडखांब येथील सोपानदेव आनंदा पाटील यांचे मांजर्डी शिवारात शेत असून दिनांक ११ रोजी शेतातील विहिराचे पाणी संपल्याचे दिसल्याने त्यांनी त्यांचे काका हिलाल नत्थु सूर्यवंशी यांना विचारणा केली असता त्यांनी अश्लील शिवीगाळ करत दगडाने मारण्यास सुरुवात केली. त्यामुळे सोपान खाली पडला असता त्याच्या काकाने विळ्याने वार केला. त्याने वार चुकविला मात्र कानास विळा लागल्याने रक्त येवू लागले. फिर्यादी बेशुद्ध झाल्याने आजूबाजूच्या शेतात काम करणाऱ्या मजुरांनी त्यास उठवत प्राथमिक उपचार केले. त्यानंतर खाजगी दवाखान्यात उपचार करून अमळनेर पोलीसात हिलाल सूर्यवंशी यांच्या विरुद्ध गुन्हा दाखल करण्यात आली असून पुढील तपास हेकॉ सुनील जाधव हे करीत आहेत.