सडावन येथे दत्त मंदिराजवळ घटना, अमळनेर पोलिसांत गुन्हा दाखल…
अमळनेर:- पारोळा मार्गे मालेगावला कत्तलीसाठी दहा गुरे निर्दयीपणे कोंबून नेत असताना पोलिसांनी रंगेहाथ पकडल्याची घटना १९ रोजी सकाळी साडे सहा वाजता तालुक्यातील सडावन येथे दत्त मंदिराजवळ घडली.
अमळनेर पोलिस ठाण्यातील हेकॉ सुनील महाजन, अमोल पाटील, अशोक कुमावत,सुनील पाटील हे १९ रोजी सकाळी ६ वाजता पारोळा रस्त्यावर गस्त घालत असताना त्यांना सडावण गावाजवळ एक पिकअप वाहन वेगाने जाताना दिसल्याने पोलिसांनी त्याला थांबवण्याचा प्रयत्न केला असता तो जोरात निघून गेला. पोलिसांनी वाहनाचा पाठलाग करून त्याला सडावण गावाच्या शिवारात दत्त मंदिराजवळ थांबविले. तेव्हा पिकअप वाहन (क्रमांक एम एच ४१ जी २९६८) मध्ये दहा गुरे निर्दयीपणे कोंबून भरण्यात आलेली होती. वाहनातील एकजण पळून गेला. पोलिसांनी अर्शदखान अल्ताफखान (वय २६ रा कमालपुरा कसाबवाडा मशीद जवळ मालेगाव) याला ताब्यात घेतले असून त्याने फरार झालेल्या चालकाचे नाव अरबाज खान असल्याचे सांगितले. अमोल पाटील यांच्या फिर्यादीनुसार आरोपी विरुद्ध प्राणी संरक्षण कायदा व मोटरवाहन कायद्यानुसार गुन्हा दाखल करण्यात आला असून त्यांच्या जवळून एक लाख १३ हजार रुपयांची दहा गुरे आणि तीन लाखाचे वाहन जप्त करण्यात आले आहे. दहाही गुरांना चोपडा रस्त्यावरील पांझरापोळ गोशाळेत रवाना करण्यात आली आहेत. तपास पोलीस उपनिरीक्षक नामदेव बोरकर करीत आहेत.
