अमळनेर-अमळनेर विधानसभा मतदारसंघात महाविकास आघाडीतर्फे कुणाला उमेदवारी मिळणार याबाबत अनेक दिवसांपासून खल सुरू असताना जागा काँग्रेसला सुटून डॉ.अनिल शिंदेचे नाव निश्चित झाले असून पक्षातर्फे ए बी फॉर्म दिला जाणार आहे. त्यामुळे तिरंगी लढत होणार आहे.
खरे पाहता डॉ.अनिल शिंदे यांनी गेल्या काही महिन्यांपासून निवडणुकीसाठी शड्डू ठोकून जोरदार तयारी सुरू केली होती, साम दाम दंड भेद हे निवडणुकीसाठी लागणारे सर्व अस्त्र वापरण्याची तयारी ते दाखवीत होते, गणोशोत्सवात मंडळांसाठी योगदान असेल, तालुक्यातील धार्मिक व सांस्कृतिक कार्यक्रमांना मदत करणे असेल किंवा जनतेचे वाढदिवस, द्वारदर्शन,विवाह सोहळे,पीक पाहणी अश्या विविध माध्यमातून सतत ते जनसंपर्कात राहिले होते.विरोधी पक्षातील इतर इच्छुक उमेदवारांच्या तुलनेत सर्वच बाबतीत ते सक्षम दिसून आले होते, यामुळे काँगेसच्या उमेदवारी वर त्यांनी जोरदार दावा करीत उमेदवारी मागितली होती. जागा आधी पवार गटाला सुटेल म्हणून डॉ शिंदे हे उमेदवारी साठी तेथेही प्रयत्नशील होते. आणि ते मुंबईत तळ ठोकून होते. मात्र जागा काँग्रेसला सुटल्याने तुल्यबळ उमेदवार म्हणून डॉ. शिंदे यांची निवड झाली आहे. पक्षाने त्यांची सुरू असलेली जोरदार तयारी आणि मागील काळात काँग्रेसकडून सक्षमपणे लढवीलेली विधानसभा निवडणुकीत पाहता डॉ शिंदे यांच्या नावावर शिक्कामोर्तब केल्याची माहिती आहे.२९ रोजी ते आपली उमेदवारी दाखल करणार आहेत.
सदर उमेदवारी नंतर अमळनेर येथे महायुतीचे उमेदवार अनिल पाटील, अपक्ष उमेदवार माजी आमदार शिरीष चौधरी आणि महाविकास आघाडीतर्फे डॉ अनिल शिंदे अशी तिरंगी लढत होणार आहेत.
