अमळनेर:- महाविकास आघाडीचे काँग्रेस पक्षाचे उमेदवार डॉ. अनिल शिंदे यांचा उमेदवारी अर्ज आज ता. 29 रोजी दाखल करण्यात आला. परवा बंडखोर उमेदवाराचा अर्ज भरण्यासाठी गेलेल्या पदाधिकारी यांनी निरीक्षकांच्या धाकाने काल अधिकृत उमेदवार डॉ. शिंदेच्या रॅलीत हजेरी लावली. मात्र या रॅली दरम्यान डॉ. शिंदे यांचे डॉ. रवींद्र चौधरी यांनी केलेल्या सत्काराची चर्चा रंगली आहे.
महाविकास आघाडीचे तसेच काँग्रेसचे उमेदवार डॉ. अनिल नत्थु शिंदे यांनी उपविभागीय अधिकारी नितीन मुंडावरे यांच्याकडे त्यांच्या उमेदवारीचा अर्ज सादर केला. उमेदवारी अर्ज दाखल करण्याआधी डॉ. अनिल शिंदे यांनी
संत सखाराम महाराज वाडी संस्थानमध्ये सखाराम महाराजांचे आशीर्वाद घेतले. यावेळी महाविकास आघाडीचे पदाधिकारी व कार्यकर्ते मोठ्या संख्येने उपस्थित राहून शक्ती प्रदर्शन केले. याप्रसंगी जुगल प्रजापती (अखिल भारतीय काँग्रेस कमिटी नवी दिल्ली, जळगाव जिल्हा निरीक्षक) सुभाष देशमुख जाधव,शरदचंद्र पवार गटाचे डॉ बी एस पाटील,महिला राज्य प्रमुख तिलोत्तमा पाटील, उबाठा गटाच्या ऍड ललिता पाटील उपस्थित होते.
डॉ. अनिल शिंदे व कार्यकर्त्यांनी संत सखाराम महाराज वाडी, जैन मंदिर, सराफ बाजार, मांगिरबाबा दर्शन, पाचकंदिल मार्ग, डॉ. बाबासाहेब आंबेडकर पुतळा, हुतात्मा चौक, समशेरसिंग पारधी स्मारक, सुभाष बाबू स्मारक, साने गुरुजी स्मारक, स्वामी नारायण मंदिर, बौद्ध विहार, छत्रपती शिवाजी महाराज पुतळा, बळीराजा, आणि तहसील कचेरी या ठिकाणी एकत्र येऊन समर्थन दर्शवले. यावेळी सुलोचना वाघ, प्रा. सुभाष पाटील, सुरेश पाटील, श्याम पाटील, गोकुळ बोरसे, बी. के. सूर्यवंशी, संदीप घोरपडे, सय्यद तेली, विजू मास्तर, पराग पाटील, कुणाल पाटील,कविता पवार, रिता बाविस्कर, राजू शेख, अजहर अली सय्यद, जुबेर पठाण मुन्ना शर्मा, धनगर दला पाटील, संजय पुनाजी पाटील, शांताराम पाटील, योजना पाटील, मनोहर निकम, दिनेश पवार, समाधान कंखरे, मयूर पाटील, महेश पाटील आदी महाविकास आघाडीचे कार्यकर्ते यावेळी उपस्थित होते.
डॉ. चौधरींनी केलेल्या सत्काराची चर्चा…
डॉ. शिंदे यांची रॅली शिरीष चौधरी यांच्या कार्यालयासमोरून जात असताना डॉ. रवींद्र चौधरी यांनी समर्थकांसह येऊन त्यांचे स्वागत करत शाल श्रीफळ देत सत्कार केला. त्यामुळे मतदारसंघात चर्चांना उधाण आले आहे. यंदाच्या निवडणुकीत पडद्यामागे अनेक गोष्टी व तडजोडींनी रंगत आणली आहे, ही पण त्यातलीच एक तडजोड तर नाही ना ? अश्या चर्चा आता रंगू लागल्या आहेत.
