अमळनेर:- तालुक्यातील पोलीस पाटील संघटनेच्या तालुकाध्यक्ष पदाचा तिढा मतदान प्रक्रिया राबवून लोकशाही पद्धतीने सोडवण्यात आला असून सात्री येथील पोलिस पाटील विनोद बोरसे यांची तालुकाध्यक्ष पदी निवड करण्यात आली आहे.
गेल्या दोन महिन्यापासून अमळनेर तालुक्यातील पोलीस पाटलांचा तालुकाअध्यक्ष पदाबाबत वेळोवेळी बैठका घेऊनही तिढा सुटत नव्हता. अखेर ४ ऑक्टोबर रोजी पोलीस पाटील गावकामगार संघाचे राज्याध्यक्ष बाळासाहेब बाजीराव शिंदे, राज्यउपाध्यक्ष ज्ञानेश्वर नामदेव महाजन, राज्यसंघटक भाऊसाहेब संतोष पाटील, निळकंठ थोरात, साहेबराव पाटील, महिला आघाडी अध्यक्षा तृप्ती मांडेकर, पश्चिम महाराष्ट्र कार्याध्यक्ष रोहिणी हांडे पाटील, महिला राज्य सदस्य लीला पाटील, जळगाव जिल्हाध्यक्ष नरेंद्र शिंदे, धुळे जिल्हा अध्यक्ष प्रकाश पाटील यांच्यासह जिल्ह्यातील सर्व तालुकाध्यक्ष, कार्याध्यक्ष, धुळे व जळगाव जिल्ह्यातील सर्व पदाधिकारी यांच्या उपस्थितीत निवडणूक घेऊन नवीन तालुकाध्यक्षाची निवड करण्यात आली. यावेळी तालुक्यातील ज्येष्ठ पोलीस पाटील विलास धोंडू पाटील (जानवे) यांच्यासह तालुक्यातील सर्व पोलीस पाटील बंधू आणि भगिनी हजर होते. अमळनेर येथील मंगळ ग्रह मंदिर येथे जिल्हा आढावा बैठकीसह निवडणूक प्रक्रिया राबविण्यात आली, त्यात तालुक्यातील सर्व पोलीस पाटील बंधू भगिनींनी मतदान करण्याचा हक्क बजावला. सात्री येथील विनोद शालिग्राम बोरसे (माजी सैनिक) यांच्याशी संघाचे जिल्हा सचिव लखीचंद रमेश पाटील यांची सरळ लढत झाली. विनोद बोरसे यांना ६४ तर लखीचंद पाटील यांना ५४ मते मिळाल्याचे विनोद बोरसे हे विजयी झाल्याने राज्याध्यक्ष यांच्या उपस्थितीत नवीन तालुका अध्यक्ष यांची सनद देऊन नियुक्ती करण्यात आली. यावेळी लवकरच तालुक्यातील उर्वरित कार्यकारणीची घोषणा तालुक्यातील सर्व पोलीस पाटील बंधू-भगिनी यांच्या उपस्थितीत करण्यात येईल असे तालुकाध्यक्ष विनोद बोरसे यानी सांगितले. विनोद बोरसे यांच्यावर तालुक्यासह राज्यातील अनेक पोलीस पाटलांसह, समाजातील राजकीय, सामाजिक क्षेत्रातील अनेक मान्यवरांनी शुभेच्छांचा वर्षाव केला.
दोन्ही भावांच्या हाती दोन संघटनांची कमान, गावाचे प्रशासन व कायदा सुव्यवस्थेची ही जबाबदारी…
पोलिस पाटील गाव कामगार संघटनेचे नूतन तालुकाध्यक्ष विनोद बोरसे हे माजी सैनिक असून आपल्या मोठ्या भावाचा आदर्श घेत अल्पावधीतच त्यांनी गावच्या कायदा सुव्यवस्थेची कमान हाती घेऊन पोलिस पाटील पदाची जबाबदारी घेतली. दोन्ही भावांच्या हाती दोन संघटनांची कमान हाती आली आहे. महेंद्र बोरसे हे गावचे सरपंच तसेच सरपंच परिषदेचे तालुकाध्यक्ष आहेत. त्याच्याच पावलावर पाऊल ठेऊन विनोद बोरसे यांनी कार्य केल्याने त्यांच्या गळ्यात पोलिस पाटील संघटनेच्या तालुकाध्यक्ष पदाची माळ त्यांच्या गळ्यात पडली आहे. एकंदरीत मोठा भाऊ गावाचे प्रशासन सांभाळत असून लहान भावाच्या हातात कायदा सुव्यवस्थेची राखण्याची जबाबदारी आल्याने अनोखा दुहेरी योग जुळून आला आहे.
