निम शिवारातील घटना, शेतकऱ्याचे तीन लाखाचे नुकसान…
अमळनेर:- तालुक्यातील निम शिवारात शॉर्ट सर्किटमुळे आग लागून शेतातला ऊस खाक झाल्याची घटना काल १५ रोजी दुपारी घडली आहे.
याबाबत अधिक माहिती अशी की, निम शिवारात कळमसरे येथील मूळ रहिवासी व सध्या शिरपूर येथे राहत असलेल्या रजुसिंग प्रतापसिंग पाटील यांचे २ बिघे शेत असून ते गोपाळ पाटील यास बटाईने दिले असून त्यात मागील वर्षी ऊस लावला होता. दिनांक १५ रोजी दुपारी १ वाजता शेतातून निम गावाकडे गेलेल्या इलेक्ट्रिक तारांच्या खांबावर शॉर्ट सर्किट होवून ठिणग्या शेतात पडल्याने उसाने पेट घेतल्याची माहिती गोपाळ पाटील यांनी राजुसिंग यांना दिली. त्यानतंर अग्निशामक दलाची गाडी बोलवून आग विझवण्यात आली. शेतकऱ्याने पाहणी केली असता शेतातील संपुर्ण उसाचे पीक खाक झाले असून अंदाजे तीन लाखाचे नुकसान झाले आहे. याप्रकरणी मारवड पोलीसात खबर देण्यात आली असून पुढील तपास पो. बालकृष्ण शिंदे करीत आहेत
