वाचन संस्कृतीचे जतन-संवर्धन व विविध उपक्रमात सक्रिय सहभागाबाबत पत्राद्वारे गौरव…
अमळनेर:- विद्यार्थ्यांची विचारप्रक्रिया गतिमान करण्यासाठी वर्ग ग्रंथालय योजना सुरु करून विद्यार्थ्यांमध्ये वाचन संस्कृतीचे जतन-संवर्धन करीत शैक्षणिक व सांस्कृतिक कला, क्रिडा क्षेत्रात उल्लेखनिय कार्य केल्याबद्दल येथील साने गुरुजी नूतन माध्यमिक विद्यालयातील उपक्रमशील शिक्षक डी. ए. धनगर यांचे जळगावचे खासदार उन्मेश भैय्यासाहेब पाटील यांनी पत्र पाठवून विशेष कौतुक केले आहे.
खा. उन्मेष पाटील यांनी डी. ए. धनगर सर यांचे अभिनंदन कौतुक करीत पत्रात म्हटले आहे की, आपण शैक्षणिक तसेच सांस्कृतिक आणि कला व क्रीडा क्षेत्रात उल्लेखनीय कार्य करीत आहात नुकतेच आपण विद्यार्थ्यांमध्ये वाचन संस्कृतीचे जतन, संवर्धन वृद्धिंगत करण्यासाठी वर्ग ग्रंथालय योजना सुरु करून ‘वाचक वीर स्पर्धा’ राबविली यात प्रथम दुर्गेश पाटील, द्वितीय- प्रतिक कड, तृतीय- विवेक निकम’ या सर्वांसह सहभागी वाचक विरांचे हार्दिक अभिनंदन व पुढील वाटचालीस शुभेच्छा. मुळातच मानवी जीवनामध्ये शिक्षण क्षेत्राचे अनन्यसाधारण महत्त्व आहे. आपणासह सर्व सहभागी विद्यार्थी व विद्यार्थिनींसह, मार्गदर्शक सहशिक्षकांचेही हार्दिक अभिनंदन आपण सर्व घेत असलेल्या कठोर परिश्रमांचेच हे फळ होय तसेच आपल्या हातून राष्ट्रहिताचे शैक्षणिक व सामाजिक कार्य निरंतर घडत रहावे, असा आशावाद या पत्रात व्यक्त केला आहे.
साने गुरुजी शाळेचे उपक्रमशील शिक्षक डी. ए. धनगर हे शाळेत विद्यार्थ्यांसाठी विविध उपक्रम राबवत असतात. तसेच विविध स्पर्धा परीक्षा व विकासात्मक चळवळीत त्यांचा सक्रिय सहभाग असतो. त्यांच्या या कार्याचा खासदारांनी केलेल्या गौरवाबद्दल सर्वच क्षेत्रातून अभिनंदनाचा वर्षाव होत आहे.
