रंजाणे येथील एकावर मारवड पोलिसांत गुन्हा दाखल…
अमळनेर:- तालुक्यातील रंजाणे येथे २३ वर्षीय तरुणाच्या मानेवर तीक्ष्ण हत्याराने वार केल्याने सदर तरुण गंभीर जखमी झाला असून एकाविरुद्ध मारवड पोलिसांत गुन्हा दाखल करण्यात आला आहे.
याबाबत अधिक माहिती अशी की, रंजाणे येथील २३ वर्षीय तन्वीर मुस्ताक खाटीक हा उधना, सुरत येथे मजुरी करून उदरनिर्वाह करतो. तब्येत बरी नसल्याने तो पत्नीसह गावी रंजाणे येथे आला होता. दि. १५ रोजी रात्री ८:३० वाजेच्या सुमारास तो गावातील वडाच्या झाडाखाली कट्ट्यावर बसला असताना गावात राहणारा रोहित भाऊसाहेब गरुड हा आला व माझी बहीण घरातून निघून गेली आहे, व त्यामागे तुझा हात आहे असे सांगत वाद घालून तीक्ष्ण हत्याराने तन्वीरच्या मानेवर वार केला. गंभीर दुखापत झाल्याने तन्वीर यास खाजगी दवाखान्यात दाखल करण्यात आले. त्याच्या मानेवर टाके टाकण्यात आले असून तो काहीही बोलण्याच्या परिस्थितीत नसल्याने जखमीचे वडील मुस्ताक खाटीक यांच्या फिर्यादीवरून मारवड पोलिसांत रोहित गरुड याच्याविरुद्ध गुन्ह्याची नोंद करण्यात आली आहे. पुढील तपास पीएसआय बाळकृष्ण शिंदे करीत आहेत.
