तालुक्यातील मठगव्हाण व खापरखेडा येथील शेतकऱ्यांना केले मार्गदर्शन….
अमळनेर:- तालुक्यातील मठगव्हाण व खापरखेडा प्र ज येथे हरित क्रांतीचे प्रणेते व माजी मुख्यमंत्री स्वर्गवासी वसंतराव नाईक यांच्या पुण्यतिथी निमित्ताने कृषी विभागाच्या विविध योजनांच्या जागृतीसाठी मेळावा आयोजित करण्यात आला होता.
सदर कार्यक्रमात पातोंडा मंडळ कृषी अधिकारी मयूर कचरे यांनी कृषी विभागाच्या विविध योजनांबाबत माहिती शेतकऱ्यांना दिली व त्या योजनांचा लाभ घेण्यासाठी महाडीबीटी येथे अर्ज करण्यास शेतकऱ्यांना सांगितले. कृषी पर्यवेक्षक योगेश वंजारी यांनी पीएमएफएमई योजनेबाबत विस्तृत अशी माहिती दिली व योजनेचा लाभ घेण्याबाबत शेतकऱ्यांना सांगितले. कृषी सहाय्यक निलेश पाटील यांनी पी एम किसान योजनेबाबत शेतकऱ्यांना विस्तृत असे मार्गदर्शन केले. कृषी सहायक अनिकेत सूर्यवंशी यांनी शेतकऱ्यांना कापूस पिकाबाबत मार्गदर्शन केले. सदर कार्यक्रमास मठगव्हाण व खापरखेडा प्र ज येथील शेतकरी उपस्थित होते.
