शिरसाळेजवळील घटना, एकावर पोलिसांत गुन्हा दाखल…
अमळनेर:- तालुक्यातील शिरसाळेजवळ दिनांक १० रोजी झालेल्या अपघातात एकाचा उपचारादरम्यान मृत्यु झाला असून एकावर मारवड पोलिसांत गुन्ह्याची नोंद करण्यात आली आहे.
याबाबत अधिक माहिती अशी की, दिनांक १० रोजी दुपारी १ वाजेच्या सुमारास तरवाडे येथील सतीश दिलीप अहिरे (वय ३७) हा शिरसाळे रोडवरील हायस्कूल जवळ फॅशन प्रो क्रमांक एमएच ४३ टी ४७५८ या गाडीने जात असताना समोरून येणाऱ्या बजाज प्लॅटिना (एमएच १९ डीक्यू ०६९७) गाडीवर येणाऱ्या दुचाकीस्वाराने धडक दिल्याने सतीश हा रस्त्याच्या कडेला पडल्याने त्याच्या डोक्याला, हातापायाला जबर मार लागला होता. तसेच प्लॅटिना गाडीवरील चालक व त्याची पत्नी यांना ही मार लागला होता. या तिघांना नातेवाईक व ग्रामस्थांनी अमळनेर येथे खाजगी दवाखान्यात दाखल केले. सतीश यास डोक्याला जास्त मार लागून रक्तस्त्राव जास्त झाल्याने त्यास धुळे येथे हिरे मेडिकल मध्ये दाखल करण्यात आले. मात्र दिनांक ११ रोजी रात्री १२ वाजेच्या सुमारास उपचारादरम्यान मृत्यु झाल्याचे डॉक्टरांनी घोषित केले. त्यामुळे विलास अहिरे यांच्या फिर्यादीवरून प्लॅटिना गाडी चालक नामदेव बडगुजर (रा. भातखंडे, ता एरंडोल) याच्या विरुद्ध मारवड पोलिसांत गुन्ह्याची नोंद करण्यात आली आहे. पुढील तपास हेकॉ भरत श्रीराम ईशी हे करीत आहेत.
