अमळनेर पोलिसात गुन्हा दाखल,गंमत पडली चांगलीच महागात…
अमळनेर :- तालुक्यातील डांगर येथील इसमाने गमतीत ११२ क्रमांकावर कॉल करत भांडण होत असल्याची माहिती दिल्याने त्याच्यावर चांगलीच आफत ओढवत गंमत त्याला चांगलीच महागात पडली आहे.
अति तात्काळ सेवांसाठी जिल्हा पोलिस विभागाकडून ११२ ही फोन सेवा सुरू करण्यात आली असून या यंत्रणेवर रात्र दिवस पोलीस अंमलदाराची नियुक्ती केली आहे. काल २२ जानेवारी रोजी अमळनेर तालुक्यातील डांगर येथील धनराज कडू भील याने ११२ क्रमांक डायल करत वाद असल्याची तक्रार करत पोलीस मदत तात्काळ पाठवण्याची मागणी केली. लागलीच अमळनेर पोलीस ठाण्यातून पो.ना. भामरे, पोहेकॉ मधुकर पाटील, पोना सूर्यकांत साळुंखे यांनी डांगर येथे भेट दिली धनराज याला विचारले असता त्याने सांगितले की, मी मजाक मध्ये ११२ क्रमांकावर फोन केला असून पोलीस येतात की नाही ते पहायचे होते असे सांगत भांडण वैगरे काही झाले नाही असे सांगितले. सदर इसम धनराज हा दारूच्या अमलाखाली असल्याचे समजून आले. त्यास पोलीस ठाण्यात आणून खोटी माहिती दिल्याप्रकरणी भादवि कलम १८२, व महा. दारूबंदी अधिनियम ८२(१) अन्वये गुन्ह्याची नोंद करण्यात आली आहे.
पोलीस यंत्रणेने केले आवाहन, मस्करी केल्यास होतील गुन्हे दाखल…
११२ क्रमांक हा अति महत्त्वाच्या वेळेस डायल करणे आवश्यक आहे जसे कि, महिला छेडखानी, गंभिर स्वरुपाचा गुन्हा, चोरी, दरोडा, महिला अत्याचाराचे बाबतीत व शाळकरी मुलीचे छेडखाणीचे गुन्हे, कायदा व सुयवस्थाचे प्रश्न अशा वेळी तत्काळ पोलीस मदत मिळावी म्हणून वापरणे अपेक्षित आहे . परंतु बऱ्याच वेळा दिवाणी बाबी, इतर विभागाशी संबधीत प्रकरणे वा चेष्टा मस्करीत डायल ११२ ला फोन केले जातात व खोटी माहीती देवुन प्रशासकिय यंत्रणेचा गैरवापर केला जातो या पुढे खोट्या कारणासाठी डायल ११२ ला फोन केल्यास त्याचेवर गुन्हे दाखल केले जातील तसेच अत्यावश्यक कारणासाठी सर्वसामान्य जनतेने याचा जरूर वापर करावा असे आवाहन अमळनेर पोलीसानीं केले आहे.
