सराफ वर्मा यांनी केला अमळनेर पोलिसांचा सत्कार…
अमळनेर:- दागिने, रोख रक्कम व पिस्टल असलेली बॅग परत मिळाल्याने सराफ व्यापाऱ्याने अमळनेर पोलिसांचा सत्कार केला आहे.
दि. २४ रोजी अमळनेर शहरात पोहेकॉ. पुरुषोत्तम वाल्डे, नाईक विनोद धनगर हे आर एफ आय डी टॅग मशिनद्वारे गस्त घालत असताना सराफ बाजारातील अचिंबा ज्वेलर्स या दुकानासमोर पहाटे ३:४५ वाजता बॅग आढळून आली. त्यात पाहणी केली असता त्यात सोन्याचे दागिने, रोख रक्कम, चेक, कागदपत्रे तसेच पिस्तल होते. दुकानाचे शटर वाजवून मालक विनोद वर्मा यांना बाहेर बोलवले असता त्यांनी मी रात्री १ वाजता गावावरून आलो तेव्हा बॅग बाहेरच विसरून गेल्याचे नमूद केले. त्यावेळी दोन्ही अमलदारांनी ऐवजाची खात्री करून त्यांच्या ताब्यात दिले होते. काल सराफ विनोद वर्मा यांनी अमळनेर पोलीस ठाण्यात येत दोन्ही अमलदारांमुळे माझा ऐवज मिळाला असून त्यांचा सत्कार केला. यावेळी दोन्ही अमलदारांमुळे पोलीस ठाण्याची प्रतिमा उंचावण्यास मदत झाल्याने सर्वांनी त्यांचे कौतुक केले.
