दुतर्फा गटारी मागणीकडे सा.बां. विभाग दुर्लक्ष करत असल्याचा आरोप…
सागर मोरे
पातोंडा ता.अमळनेर:- येथील पातोंडा मठगव्हाण रोडवर मराठी शाळेच्या काही अंतरावर पावसाच्या पाण्याची भली मोठी डाब साचल्याने वाहनांच्या सदर डबके अपघाताला निमंत्रण ठरत असून परिणामी स्थानिक परिसरात रोगराई पसरण्याची भीती स्थानिक रहिवाशांमधून होताना दिसत आहे.
पातोंडा गावातून तापी नदीच्या तीरावर वसलेल्या मठगव्हाण, रुंधाटी, नालखेडा, खापरखेडा, गंगापुरी आदी गावांना जोडणारा सार्वजनिक बांधकाम विभागाचा रस्ता आहे. सदर रस्त्यावर नेहमीच वाहनांची वर्दळ असते.पाऊस सुरू झाल्याने दरवर्षी सदर जागेवर पाण्याचे भलेमोठे डबके साचते. परिणामी सदर डबक्यातील पाण्याचा अंदाज येत नसल्याने वाहनांना वाहने थांबवून पाण्यातून वाट काढावी लागते तर काही वाहने थेट जात असल्याने किरकोळ अपघात होत असतात. सदर रस्ता अरुंद असल्याने वाहनांना गावांमधून वाहने काढताना जिकरीचे ठरत आहे. सदर रस्त्याच्या दुतर्फा गटारीच शिल्लक नसल्याने पावसाचे पाणी सदर रस्त्यावर साचत असते. मागील वर्षी काँक्रीटीकरण रस्त्यावर मुरूम ओतल्याने रस्ता खाली-वर झाल्याने डाब साचली आहे. दरवर्षी डाब साचत असल्याने वाहन धारकांना व पादचारीना मनस्ताप सहन करावा लागत आहे. गावाच्या गटारीतून वाहून येणारे पाणी सदर रस्त्याच्या दुतर्फा असलेल्या गटारीतून वाहून सुटवा नाल्यात जाते. पण दोन्हीकडील गटारी ह्या जीर्ण झाल्या असून गटारीतून पाणी वाहत नाही परिणामी ते सदर रस्त्यावर साचत असते. सद्यस्थितीत पादचाऱ्यांना रस्त्यावरून जाता येत नसून वाहनधारकांना देखील वाहने तुंबून न्यावी लागत आहे. सदर डबक्यामुळे देखील सदर परिसरात रोगराईजन्य परिस्थिती निर्माण होऊ शकते. दरवर्षी होणाऱ्या ह्या समस्येसंदर्भात सामाजिक कार्यकर्ते घनश्याम पाटील, सागर मोरे ह्यांनी सार्वजनिक बांधकाम विभागाला रस्त्याच्या दोन्हीकडील गटारींचे रुंदीकरण व खोलीकरण करण्याची वारंवार मागणी केली असून ग्राम पंचायतीने देखील तसे निवेदन दिले होते मात्र सार्वजनिक बांधकाम विभागाकडून केराची टोपली दाखवण्यात आली आहे.तरी सार्वजनिक बांधकाम विभागाने जाणीवपूर्वक लक्ष घालून सदर रस्त्याचे गावात रुंदीकरण करून पोलीस चौकी ते सुटवा नाल्यापर्यंत रस्त्याच्या दोन्हीकडील असलेल्या गटारी बांधून दरवर्षी होणारी ही परिस्थितीची समस्या मिटवावी व आमदार अनिल पाटील यांनीही सदर समस्येकडे लक्ष देऊन काम मार्गी लावावे अशी मागणी वाहनधारक व पातोंडा ग्रामस्थांमधून होत आहे.
