ढेकु खु. येथून ठिबक नळ्यांचे २१ बंडल नेले होते चोरुन…
अमळनेर:- ठिबक संच चोरणाऱ्या तिघांना पारोळा पोलिसांनी ताब्यात घेतले असून याच आरोपींनी ढेकु खु. येथून ठिबक नळ्यांचे २१ बंडल चोरल्याची फिर्याद शेतकऱ्याने दाखल केली आहे.
याबाबत अधिक माहिती अशी की, ढेकु खु. येथील शेतकरी सुभाष रणछोड पाटील यांच्या शेतातून मे महिन्यात ३० हजार किमतीचे ठिबक संचाचे २१ बंडल चोरुन नेले होते. याबाबत त्यांनी पोलीस पाटील यांना माहिती दिली परंतु चोरटे सापडतील याची खात्री नसल्याने पोलीसात तक्रार दाखल केली नव्हती. त्यानंतर ५ ऑगस्ट रोजी पारोळा पोलिसांनी ठिबक नळ्या चोरणाऱ्या अंकुश नेहरू पाटील (पळसखेडा), रोशन ठसकन पवार (पळसखेडा), भूपेंद्र कैलास पाटील(जामोद) या तिघांना अटक केली होती. सदर आरोपींनी ढेकु खु. येथून ही चोरी केल्याची कबुली दिली व सदर शेतकऱ्याने पारोळा पोलिसात जावून याबाबत खात्री केल्याने तिघांविरुद्ध अमळनेर पोलीसात तक्रार दाखल केली आहे. त्या अन्वये अमळनेर पोलीसात भादवि कलम ३७९, ३४ नुसार गुन्हा दाखल करण्यात आला असून पुढील तपास पो. प्रकाश पाटील हे करीत आहेत
