नवीन समीकरणे जुळून आल्याने ग्रा. पं. निवडणुकीत वाढली चुरस…
अमळनेर:- तालुक्यातील मारवड ग्रामपंचायत निवडणुकीत मारवड विकास पॅनल ही नवीन आघाडी तयार झाली असून यंदा ग्रामपंचायत निवडणुकीत अनेक उलटफेर पाहायला मिळणार आहेत.
माजी सरपंच दिलीप शामराव साळुंखे, भिकन भालेराव पाटील, उमाकांत गिरिधर साळुंखे, सुभाष बाबुराव भील यांच्या नेतृत्वात हे मारवड विकास पॅनल तयार झाले असून यंदा ग्रामपंचायत निवडणुकीत उतरणार असल्याचे त्यांनी स्पष्ट केले आहे. सध्याचे सत्ताधारी व विरोधक यांचे दोन पॅनल होण्याची शक्यता असून नवीन समीकरणे जुळून आल्याने हे तिसरे पॅनल उभे ठाकले आहे. “गेल्या पंचवार्षिक निवडणुकीनंतर मंदावलेल्या विकासाचा आलेख पाहता अनुशेष भरून काढण्यासाठी नवीन पॅनलचा पर्याय ग्रामस्थासमोर ठेवला असल्याचे पॅनल प्रमुखांनी स्पष्ट केले आहे. त्यामुळे मारवड ग्रामपंचायत निवडणुकीत चुरस वाढली असून ग्रामस्थांचा कौल कोणाला मिळेल हे पाहणे महत्त्वाचे ठरणार आहे.
