शिवभक्तांची निघाली भव्य मिरवणूक, ढोल पथक व लाठ्याकाठ्यांची कर्तबगारी लक्षवेधी…
अमळनेर:- अमळनेरकरांची मानाची सार्वजनिक शिवजयंती मिरवणूक पारंपरिक पध्दतीने हातात भगवे झेंडे, डोक्यावरील फेटे घातलेल्या हजारो शिवभक्तांच्या प्रचंड जल्लोषात मोठ्या थाटामाटात पाचपावली मंदीर ते छ. शिवाजी महाराज नाट्यगृहापर्यंत संपन्न झाली.
हजारोंच्या संख्येने शिवभक्तांनी भव्य दिव्य मिरवणूकीने अमळनेकरांचे लक्ष वेधले. सार्वजनिक शिवजयंतीचे मुख्य आकर्षण ठरले ते राजमुद्रा मुलामुलींचे ढोल पथक तर टाकरखेडा एस पी गृपचे मुला मुलींचे लाठ्याकाठ्यांची कर्तबगारी लक्षवेधी ठरली. सरस्वती विद्या मंदिराच्या नववारी नेसलेल्या फेटे बांधलेल्या लहान मुलींचे लेझीम पथक, सायर देवी बोहरा स्कुलचे पथनाट्य चौकाचौकात नागरिकांना खिळवून ठेवत होते. घोडेस्वार झालेले मावळे, चालत्या वाहनावरचा नारी शक्ती इव्हेंट, गृपचा शिवजन्मोत्सव देखावा, भारत रक्षक फाउंडेशनचा जिप गाडीवरील भारत मातेचा देखावा, जिजामाता व बाल शिवबा यांचा देखावा साकारणारे विवेक पाटील, धनराज पाटील यांच्या सजवलेल्या जिपगाडी ही आकर्षण ठरल्या.
पोलीस ग्राउंड येथे उपविभागीय अधिकारी हुलवळे, तहसीलदार मिलींद वाघ, न.प.चे प्रशासन अधिकारी प्रशांत सरोदे, संजय चौधरी, ए.पी.आय शिरोडे आदिच्या उपस्थितीत सुरवात करण्यात आली. मिरवणुकीत राणाजी बँड वाद्यवृंद तरुणाईला शिवगीतांवर जल्लोषात नाचवत होती. सदर मिरवणूक पवन चौक,तिरंगा चौक, बस स्टँड, महाराणा प्रताप चौक, प्रबुद्ध विहार, जिजाऊ चौक ते छत्रपती शिवाजी महाराज नाट्यमंदीर येथे मिरवणूक विविध सांस्कृतिक कार्यक्रम सादर करून समारोप छ. शिवाजी महाराजांच्या पुतळ्याचे शिवपूजनाने करण्यात आली. याप्रसंगी मा.आ. शिरीष चौधरी, पाडळसे धरण समितीचे सुभाष चौधरी व पदाधिकारी, पोलिस निरीक्षक विजय शिंदे, ॲड. तिलोत्तमा पाटील, प्राचार्या मंजुळा नायर, नगरसेवक प्रविण पाठक, मनोज पाटील, गोकुळ पाटील, राजेंद्र यादव, मा. उपनगराध्यक्ष अनिल महाजन यांचेसह अनेक मान्यवर उपस्थित होते.
समारोप प्रसंगी नाट्यमंदीर येथे आलेल्या हजारावर शिवभक्तांना सामाजिक कार्यकर्ते रणजित शिंदे व शैलजा शिंदे यांच्यावतीने चि. शिवतेज शिंदे याच्या वाढदिवसाचे औचित्य साधत भोजनाची व्यवस्था करण्यात आली होती.तर मिरवणुकीत भैय्या महाजन यांच्या कडून थंड पेय वाटप, पाचपावली मंदीर येथे विपूल गारमेंट यांच्या वतीने अल्पोहार, हॉटेल संजयचे संचालक पवन चौधरी यांच्या कडून लस्सी वाटप, तुषार सोनार यांच्या कडून संपूर्ण मिरवणूकीत पिण्याच्या पाण्याची व्यवस्था तर खांदेश रक्षक फाउंडेशन यांच्या वतीने महाराणा प्रताप चौक येथे सरबत वाटप, जिजाऊ चौक येथे प्रेम पारधी यांच्यातर्फे अन्नदान, मंगळ ग्रह मंदिर संस्थान, मा.आ. शिरीष चौधरी, सचिन खंडारे, सचिन कलेक्शन, विनोद लांबोळे, राणाजी बँड, राधे पवार, निखील पाटील, जयेश शिंदे, गिरीष बेहरे आदींचे सहकार्य लाभले. सार्वजनिक शिवजयंती उत्सवात आमदार अनिल पाटील, नगर परिषद यांचे सहकार्यासह पोलीस प्रशासनाने सौजन्यशील असा चोख बंदोबस्त ठेवून मोलाचे सहकार्य करीत मिरवणूक वेळेवर नाटयमंदीर येथे पोहचवली. म्हणून प्रशासनाचे व मिरवणुकीच्या यशस्वीतेसाठी सहकार्य करणाऱ्यांचे आभार मानाची सार्वजनिक शिवजयंती उत्सव समितीच्या वतीने मानण्यात आले. अमळनेरकरांची मानाची सार्वजनिक शिवजयंती उत्सव समितीचे सभासद व युवा मित्र परिवाराने अथक परिश्रम घेवून कार्यक्रम यशस्वी केला.
