अमळनेर:- तालुक्यातील भोरटेक येथे काल दुपारच्या सुमारास बांध जाळताना लावलेली आग पसरल्याने बिहार पॅटर्ननुसार लावलेली हजारो झाडे जाळून खाक झाली आहेत.
तालुक्यातील भोरटेक येथे बिहार पॅटर्ननुसार दहा एकर क्षेत्रावर विविध झाडांची हजारो रोपे लावण्यात आली होती. ह्या झाडांची १० ते १५ फुटांपर्यंत चांगली वाढ झाली होती. काल दुपारच्या सुमारास गावातील एका शेतकऱ्याने बांध जाळला असता वाऱ्यामुळे आग पसरत जावून गायरान जमिनीवर लावलेल्या या झाडापर्यंत पोहचली. त्याठिकाणी असलेल्या गवतामुळे आगीने रौद्ररूप धारण करत अग्निशामक दलाचे वाहन येई पर्यंत संपूर्ण गायरान व हजारो झाडे खाक केली. त्यामुळे पर्यावरणाचे मोठे नुकसान झाले असून यावेळी अनेकांनी बघ्याची भूमिका घेतल्याने पर्यावरणप्रेमींनी या घटनेवर संताप व्यक्त केला आहे.
