जगभरातील निवडक संशोधन समीक्षकांच्या यादीत मिळाले आहे मानाचे स्थान…
अमळनेर:- तालुक्यातील मुडी प्र. डांगरी येथील रहिवाशी व मुंबईतील विश्वनिकेतन अभियांत्रिकी महाविद्यालयाचे वरिष्ठ प्राध्यापक व संगणक शास्त्र व अभियांत्रिकी विभागाचे विभागप्रमुख यांना आय ट्रिपल ई मुंबई सेक्शनचा के शंकर मेमोरियल गुणवंत संशोधन पेपर पुरस्कार जाहीर झाला असून जून महिन्यात मुंबई येथे आयोजित कॉन्फरन्स मध्ये हा पुरस्कार दिला जाईल.
दरवर्षी, असंख्य संशोधक आपआपल्या क्षेत्राच्या सीमा पार करण्यासाठी आपला वेळ आणि मेहनत गुंतवतात, परिणामी ग्राउंडब्रेकिंग शोध आणि नाविन्यपूर्ण कल्पना अस्तित्वात येतात. अश्याच प्रकारच्या अतुलनीय योगदानाची दखल घेऊन, आय ट्रिपल ई मुंबई विभागाने के. शंकर मेरिटोरियस पेपर अवॉर्ड्स 2022 ने विविध विषयांतील व्यक्तींच्या अपवादात्मक संशोधन कामगिरीचा गौरव केला. नामांकन अर्जाच्या वेळी आय ट्रिपल ई मुंबई विभागातील सदस्यांद्वारे आय ट्रिपल ई कॉन्फरन्स आणि संशोधन जर्नल्समध्ये प्रकाशित झालेल्या सर्वात उत्कृष्ट पेपर्सना गौरवांवित करण्याचा या पुरस्करांचा उद्देश आहे. सर्वोत्कृष्ट व गुणवंत संशोधन पेपर्स निवडीच्या निकषांमध्ये मौलिकता, उपयुक्तता, समयसूचकता, प्रभाव, तांत्रिक सामग्री, विषयाची प्रासंगिकता आणि सादरीकरणाची स्पष्टता या बाबींचा समावेश केला आणि पुरस्कारांची घोषणा करण्यात आली. या पुरस्कारांच्या निवडीसाठी आय ट्रिपल ई मुंबई विभागातर्फे एक पुरस्कार समिती गठीत करण्यात आली होती. के. शंकर मेरिटोरियस पेपर अवॉर्ड्स 2022 ला प्रचंड संख्येने प्रतिसाद मिळाला असून यात समाविष्ट संशोधन पेपर्स, जे जगभरात आयोजित केलेल्या अपवादात्मक संशोधनावर प्रकाश टाकतात. पुरस्कारासाठी निवडलेल्या पेपर्समध्ये उल्लेखनीय नावीन्य, गंभीर विचार आणि त्यांच्या संबंधित डोमेनसाठी सखोल अभ्यास दिसून आला. विजेत्यांची यादीत प्रा.डॉ. शशिकांत पाटील, मोहित सेवक, श्लोक दोशी, पूजा सिंग, हेमंत राठोड यांचा समावेश आहे. प्रा. डॉ. शशिकांत पाटील यांच्या कृत्रिम बुद्धिमत्ता व इमेज प्रोसेसिंगच्या दंतरोगातील क्षय आणि पोकळी या विषयावरील संशोधन पेपरला कॉन्फरन्स प्रोसिडिंग्ज कॅटेगरीतील सर्वोत्कृष्ट पेपर पुरस्कार जाहीर झाला असून त्यांच्यावर सर्व स्तरावरील मान्यवरांकडून अभिनंदनाचा वर्षाव होत आहे. प्रा. डॉ. शशिकांत पाटील यांनी आजमितीस राष्ट्रीय व आतंराष्ट्रीय स्तरावर अनेक शोधनिबंध प्रकाशित केले असून जगभरातील निवडक संशोधन समीक्षकांच्या यादीत त्यांना मानाचे स्थान आहे. प्रा. डॉ. पाटील हे मुडी येथील सेवानिवृत्त शिक्षक एस बी पाटील यांचे सुपुत्र असून पत्रकार चंद्रकांत पाटील यांचे लहान बंधू आहेत.
