मारवड ग्रा. पं. निवडणुकीत तिरंगी लढतीची शक्यता…
अमळनेर:- तालुक्यात ऐन हिवाळ्यात ग्रामपंचायतीच्या निवडणुकीने वातावरण तापणार असून तालुक्यातील मारवड ग्रामपंचायत निवडणुकीत तिरंगी लढतीची दाट शक्यता आहे.
सत्ताधारी आणि विरोधक यांच्या पॅनल सोबत आबासो भिकन भालेराव पाटील यांनी स्वतः पॅनल तयार करून निवडणुकीत उतरणार असल्याचे स्पष्ट केले आहे. यावेळी बोलताना त्यांनी स्पष्ट केले की, विकासाचे व्हिजन घेवून स्वतंत्र पॅनल तयार करत निवडणुकीच्या आखाड्यात उतरणार आहेत. तसेच स्वतः वॉर्ड क्रमांक ४ मधून उमेदवारी करणार आहेत. मारवड हे तालुक्यातील मोठे गाव असून विकासाची खंडित झालेली परंपरा पुन्हा सुरू करण्यासाठी हे पाऊल उचलले आहे. गावाच्या विकासाच्या दृष्टीने तालुका व जिल्हा पातळीवरून तसेच थेट मंत्रालयातून वेगवेगळ्या माध्यमातून निधी आणण्याची आपली कुवत असून त्याचा उपयोग गावाच्या विकासासाठी करायचा आहे. शासनाच्या विविध योजना गावात आणून त्याचा लाभ गोरगरिबांपर्यंत पोहचवण्याचा मानस त्यांनी व्यक्त केला आहे. त्या अनुषंगाने ही स्वतंत्रपणे ही निवडणूक लढण्याचा निर्धार केला आहे.
सध्यातरी सध्याचे सत्ताधारी व विरोधक यांचे दोन पॅनल होणार असल्याची चर्चा असून तिसऱ्या पॅनलच्या एन्ट्रीने कोणाच्या मनसुब्यांवर पाणी फिरले जाते हे पाहणे औत्सुक्याचे ठरणार आहे
