आत्महत्येचे कारण गुलदस्त्यात, पोलिसांत अकस्मात मृत्यूची नोंद…
अमळनेर:- तालुक्यातील वावडे येथील २३ वर्षीय तरुणाची गळफास घेत जीवनयात्रा संपविल्याची दुर्दैवी घटना काल २७ रोजी घडली आहे.
याबाबत अधिक माहिती अशी की, वावडे येथील २३ वर्षीय तरुण जितेंद्र चतुर पाटील याने काल दिनांक २७ रोजी दुपारी दोन वाजेच्या सुमारास राहत्या घरी छतास साडीने गळफास घेत जीवनयात्रा संपविली. त्यापूर्वी त्याने आईला फोन करून लवकर घरी ये असे सांगितले होते. आत्महत्येचे कारण गुलदस्त्यात असले तरी नैराश्यातून त्याने हे कृत्य केल्याची प्राथमिक माहिती मिळाली आहे. त्याच्या मोठ्या बहिणींचे लग्न झाले असून चार बहिणींचा तो एकटा भाऊ होता. त्याच्या पश्चात आई वडील असा परिवार आहे. गावातील व्यक्तीच्या खबरीवरून मारवड पोलिसांत अकस्मात मृत्यूची नोंद करण्यात आली असून पुढील तपास पो.हे. कॉ. भरत श्रीराम इशी हे करीत आहेत.
