अमळनेर:- तालुक्यातील निम व दरेगाव येथे गावठी दारू विकणाऱ्या दोघांना पोलिसांनी रंगेहाथ पकडलं गुन्हा दाखल केला आहे.
तालुक्यातील दरेगाव येथे मारवड पोलिसांनी छापा टाकला असता गोपाल बापू पवार हा त्याच्या राहत्या घराच्या मागे मोकळ्या जागेत गावठी दारूची चोरटी विक्री करताना मिळून आला. त्याचेकडून ३० लिटर गावठी दारू मिळून आली असून नमुने घेवून उरलेल्या साहित्याचा नाश करण्यात आला. पोलिसांनी आरोपीस ताब्यात घेतले असून फिर्यादी अनिल राठोड यांच्या फिर्यादीवरून दारूबंदी अधिनियम ६५ ई अन्वये गुन्ह्याची नोंद करण्यात आली आहे. पुढील तपास पो.हवालदार संजय पाटील करीत आहेत.
तसेच तालुक्यातील निम येथे शांताराम सुपडू भील हा त्याच्या घराच्या आडोश्याला गावठी दारू विक्री करताना पोलिसांना मिळून आल्याने त्याच्याकडे ३० लिटर गावठी दारू आढळली. नमुने घेवून उरलेल्या साहित्याचा नाश करण्यात आला. आरोपीला ताब्यात घेवून पो.ना सुनील तेली यांच्या फिर्यादीवरून गुन्हा दाखल करण्यात आला असून पुढील तपास पो ना मुकेश साळुंखे हे करीत आहेत.
